არჩილ გორდულაძე: ტყუილია, თითქოს „ნაცმოძრაობის“ დროინდელ არცერთ თანამდებობის პირს კორუფციაზე ბრალი წარდგენილი არ ჰქონია

საქართველოს პარლამენტის იურიდიულ საკითხთა კომიტეტის თავმჯდომარე, არჩილ გორდულაძე ანა წითლიძის განცხადებას პასუხობს და აცხადებს, რომ მტკიცება, თითქოს ყოფილი ხელისუფლების წარმომადგენლებს კორუფციაზე ბრალი არ ჰქონიათ, სიმართლეს არ შეესაბამება.

მისი თქმით, მიხეილ სააკაშვილი სამივე ინსტანციის სასამართლოს მიერ დამნაშავედ არის ცნობილი 9 მილიონ ლარზე მეტის მითვისებისა და გაფლანგვისთვის, რაც ელიტური კორუფციის დამადასტურებელი ფაქტია. გარდა ამისა, ის მსჯავრდებულია ვალერი გელაშვილის ცემის ორგანიზებისა და სამსახურებრივი უფლებამოსილების გადამეტების, ასევე სანდრო გირგვლიანის მკვლელების შეწყალების საქმეებზე, რა ფაქტებზეც ადამიანის უფლებათა ევროპულმა სასამართლომაც დაადგინა, რომ მართლმსაჯულება კონვენციის შესაბამისად განხორციელდა.

“ტყუილია, რომ ნაცმოძრაობის დროინდელ არცერთ თანამდებობის პირს კორუფციაზე ბრალი წარდგენილი არ ქონია.

სინამდვილეში: მიხეილ სააკაშვილი სამივე ინსტანციის სასამართლოს მიერ დამნაშავედ არის ცნობილი, 9 მილიონ ლარზე მეტის მითვისებისა და გაფლანგვისთვის. სწორედ ეს არის ელიტური კორუფციის დამადასტურებელი ფაქტი.

გარდა ამისა, მიხეილ სააკაშვილი, სამივე ინსტანციის სასამართლოს მიერ დამნაშავედ არის ცნობილი ვალერი გელაშვილის ცემის ორგანიზებისა და სამსახურებრივი უფლებამოსილების გადამეტებისთვის, ასევე, სანდრო გირგვლიანის მკვლელების შეწყალების საქმეზე. ხაზგასმით უნდა აღინიშნოს, რომ ვალერი გელაშვილის ცემის საქმეზე და სანდრო გირგვლიანის მკვლელების შეწყალების საქმეზე ადამიანის უფლებათა ევროპულმა სასამართლომ დაადგინა, რომ სააკაშვილის მიმართ მართლმსაჯულება კონვენციის შესაბამისად განხორციელდა.”- განაცხადა არჩილ გორდულაძემ .