მსოფლიოში 65 წელზე უფროსი ადამიანების რაოდენობამ 5 წლამდე ბავშვების რაოდენობას პირველად გადააჭარბა

ისტორიაში პირველად, დედამიწაზე 65 წლისა და უფროსი ასაკის ადამიანების რაოდენობამ ხუთ წლამდე ასაკის ბავშვების რაოდენობას გადააჭარბა. მიზეზი შობადობის დაბალი დონე და მთელ მსოფლიოში სიცოცხლის ხანგრძლივობის გაზრდაა, - წერს Axios-ი აშშ-ის აღწერის ბიუროს მოხსენებაზე დაყრდნობით.

შობადობის შემცირებამ და სიცოცხლის ხანგრძლივობის ზრდამ შრომისუნარიან და ხანდაზმულ მოსახლეობას შორის დემოგრაფიული ბალანსი შეცვალა. პროგნოზების თანახმად, 2060 წლისთვის 65 წელზე უფროსი ასაკის ადამიანების რაოდენობა 852 მილიონიდან (2025 წელი) 2 მილიარდამდე გაიზრდება. პლანეტის მოსახლეობის საერთო რაოდენობა ამ დროისთვის 10 მილიარდს გადააჭარბებს.

მოხსენებაში აღნიშნულია, რომ 2013 წელს მსოფლიო მოსახლეობის 45% ცხოვრობდა ქვეყნებში, სადაც შობადობის კოეფიციენტი ერთ ქალზე 2,1 ბავშვი ან ნაკლები იყო. 2023 წელს ეს მაჩვენებელი 71%-მდე გაიზარდა.

ამჟამად ჩინეთსა და ინდოეთში - მსოფლიოს ორ ყველაზე ხალხმრავალ ქვეყანაში, შობადობის დონე აღწარმოების მაჩვენებელზე (2,1) დაბალია. ეს მაჩვენებელი ასევე დაბალია ბანგლადეშში, მექსიკასა და ვიეტნამში.