სომხური მედია: დასავლეთი სომხეთს რუსეთისთვის სავიზო რეჟიმის შემოღებას სთხოვს

სომხური მედიის ინფორმაციით, რუსეთის საგარეო საქმეთა სამინისტროს ოფიციალურმა წარმომადგენელმა მარია ზახაროვამ დაახლოებით ერთი კვირის წინ განაცხადა, რომ რუსეთის მოქალაქეებისთვის სომხეთის მიერ სავიზო რეჟიმის შესაძლო დაწესება არა მოსკოვის, არამედ თავად სომხეთის მოქალაქეების წინააღმდეგ იქნება მიმართული.

თუმცა, ხელისუფლებასთან დაახლოებული წყაროების ინფორმაციით, რეალურად ასეთ მოთხოვნას სომხეთს დასავლეთი უყენებს. კერძოდ, დასავლეთს სურს, რომ სომხეთმა რუსეთის მოქალაქეებისთვის სავიზო რეჟიმი შემოიღოს.

უფრო მეტიც, გამოცემის წყაროების თქმით, სწორედ ეს არის ერთ-ერთი წინაპირობა, რომლის შესრულების შემდეგაც ევროკავშირმა შესაძლოა რამდენიმე წელიწადში, სომხეთისთვის სავიზო რეჟიმი გაამარტივოს და საბოლოოდ გააუქმოს.

სომხეთის ხელისუფლებამ განაცხადა, რომ აღნიშნული პროცესი 2029 წელს დაიწყება.

გამოცემის წყაროს განცხადებით, თუ რუსეთის პრეზიდენტი ვლადიმერ პუტინი სომხეთისთვის ულტიმატუმებსა და წინაპირობებს პირდაპირი ფორმით აყენებს, დასავლეთი ამას ჩუმად, კულისებს მიღმა აკეთებს.

წყაროს ცნობით, დასავლეთის ერთ-ერთი მოთხოვნაა ასევე ეროვნული უსაფრთხოების საბჭოს ყოფილი მდივნის არმენ გრიგორიანის, რომელიმე სხვა საკვანძო თანამდებობაზე დანიშვნა.

მედია მკითხველს შეახსენებს, რომ გრიგორიანი სომხეთის პრემიერ-მინისტრმა ნიკოლ ფაშინიანმა თანამდებობიდან გაათავისუფლა, რათა აღნიშნული პოსტი ალენ სიმონიანს დაეკავებინა.

სომხური მედიის წყაროების ინფორმაციით, დასავლეთი სთავაზობს, რომ გრიგორიანი თავდაცვის სამინისტროში ან ეროვნული უსაფრთხოების სამსახურში დაინიშნოს - უწყებებში, სადაც, მათი შეფასებით, რუსეთის გავლენა ჯერ კიდევ ძლიერია.

თუმცა, გამოცემის ცნობით, რუსეთის ხელისუფლებამ თავის დროზე ყველაფერი გააკეთა იმისთვის, რომ გრიგორიანი საგარეო საქმეთა მინისტრად არ დანიშნულიყო. წყაროების თქმით, ამჯერადაც მოსკოვი მისი დანიშვნის წინააღმდეგ „ყველა შესაძლო გზით“ შეეცდება მოქმედებას.