ერგნეთში ინციდენტების პრევენციისა და მასზე რეაგირების მექანიზმის ფარგლებში შეხვედრა მიმდინარეობს

ერგნეთში 134-ე სამუშაო შეხვედრა გრძელდება. მონაწილეები გამყოფ ხაზთან მომხდარ ინციდენტებს, მათ შორის უკანონო ბორდერიზაციის ფაქტებს განიხილავენ.

ინციდენტების პრევენციისა და მათზე რეაგირების მექანიზმის ფარგლებში ქართული მხარე მოითხოვს საქართველოს უკანონოდ დაკავებული მოქალაქეების უპირობო გათავისუფლებას.

დღის წესრიგშია ასევე თამარ მეარაყიშვილისა და თავისუფალი გადაადგილების შეზღუდვის საკითხებიც.

„ვიმსჯელებთ წინა შეხვედრიდან დღემდე მომხდარ ინციდენტებზე, ვგულისხმობ უკანონო ე.წ. ბორდერიზაციას. ასევე, დღევანდელი დღის განხილვის საგანი იქნება თავისუფალი გადაადგილების საკითხი, ამ კუთხით არის სიახლეები. როგორც ჩვენთვის ცნობილია, დაემატა რამდენიმე დღე.

მოსაბრუნის ე.წ. გადასასვლელი იმუშავებს ყოველკვირეულად: ხუთშაბათს, პარასკევს, შაბათსა და კვირას. ხოლო ქარმზანისა და პერევის გადასასვლელები იმუშავებენ სამშაბათს, ხუთშაბათსა და შაბათს“, - აღნიშნა სუს-ის ანალიტიკური დეპარტამენტის უფროსის მოადგილემ ირაკლი ანთაძემ.