პიტ ჰეგსეტმა ხელი მოაწერა მემორანდუმს, რომელიც სამხედრო უწყებას ავალდებულებს, დაიცვას აშშ-ის შუალედური არჩევნები უცხოური ჩარევისგან

აშშ-ის თავდაცვის მდივანმა, პიტ ჰეგსეტმა ხელი მოაწერა მემორანდუმს, რომელიც სამხედრო უწყებას ავალდებულებს, დაიცვას აშშ-ის შუალედური არჩევნები უცხოური ჩარევისგან, - განაცხადა ორშაბათს პენტაგონმა.

აშშ-ის კიბერსარდლობა და საბრძოლო მხარდაჭერის უწყებები „განათავსებენ მოწინავე სადაზვერვო და კიბერშესაძლებლობებს“, რათა „გამოავლინონ, აღკვეთონ და გაანეიტრალონ უცხოური ჩარევა აშშ-ის დემოკრატიულ პროცესებში“ - ნათქვამია უწყების მიერ გავრცელებულ პრესრელიზში.

მემორანდუმი, რომელიც შუალედურ არჩევნებამდე დაახლოებით ხუთი კვირით ადრე გამოიცა, კიბერსარდლობას ავალებს, ითანამშრომლოს შიდა უსაფრთხოების დეპარტამენტთან, რათა აღკვეთოს აშშ-ის საარჩევნო ინფრასტრუქტურის წინააღმდეგ მიმართული უცხოური კიბერსაფრთხეები.

მემორანდუმში აღწერილი საქმიანობის უმეტესობა ისაა, რასაც აშშ-ის სამხედრო და სადაზვერვო უწყებები 2025 წელს დონალდ ტრამპის პრეზიდენტის თანამდებობაზე დაბრუნებამდე ამერიკული არჩევნების უცხოური საფრთხეებისგან დასაცავად ახორციელებდნენ.