Bloomberg: უკრაინაში Patriot-ის რაკეტებთან დაკავშირებული ვითარება მხოლოდ ერთი წლის შემდეგ გაუმჯობესდება

აშშ-ის მხრიდან მხარდაჭერის შემცირებამ ან თუნდაც უეცარმა შეწყვეტამ შესაძლოა უკრაინა არ მიიყვანოს მყისიერ კრახამდე, თუმცა ქვეყანა კიდევ უფრო დაუცველ მდგომარეობაში აღმოჩნდება. როგორც სააგენტო Bloomberg-ი წერს, ევროპული ქვეყნები ჯერ კიდევ შორს არიან იმისგან, რომ სრულად ჩაანაცვლონ აშშ-ის შესაძლებლობები სამ ძირითად სფეროში: საჰაერო თავდაცვა, თანამგზავრული კავშირი და დაზვერვა.

„თუ აშშ სრულად შეწყვეტს დახმარებას, უკრაინა, ჩემი აზრით, შეძლებდა ადაპტირებას. თუმცა პოლიტიკური და სტრატეგიული თვალსაზრისით ეს იქნება ნეგატიური სიგნალი - სიგნალი, რომელიც მოსკოვს დამატებით თავდაჯერებულობას შემატებს“, - აცხადებს ბრიუსელის German Marshall Fund-ის ფონდის ექსპერტი, იენ ლესერი.

სარაკეტო კომპლექსები Patriot-ი, რომლებიც ბალისტიკური რაკეტებისგან ყველაზე ეფექტურ დაცვას უზრუნველყოფს, მას შემდეგ აღმოჩნდა მწვავე დეფიციტში, რაც ტრამპმა ირანის წინააღმდეგ ომი წამოიწყო.

მიუხედავად იმისა, რომ ტრამპის ადმინისტრაციამ ახლახან დაამტკიცა უკრაინისთვის 2.1 მილიარდი დოლარის ღირებულების რაკეტების მიყიდვის გარიგება, გამოცემა აღნიშნავს, რომ ეს პრობლემის სწრაფი მოგვარება არ იქნება.

„ინფორმირებული წყაროების ცნობით, Patriot-ის სისტემებისთვის განკუთვნილი PAC-2 და PAC-3 ტიპის რაკეტების ევროპული მარაგები მინიმალურ დონეზეა. ამასთან, ეროვნული შეიარაღებული ძალები ხშირად ყოყმანობენ მათ გადაცემაზე, რადგან აშშ-ისგან ახალი მარაგების თაობაზე მყარი გარანტიები არ აქვთ“, - ნათქვამია სტატიაში.

სიტუაცია დაახლოებით ერთ წელიწადში დაიწყებს გაუმჯობესებას, როდესაც უკრაინა ევროპაში წარმოებისთვის შეკვეთილ რაკეტებს მიიღებს. მოსალოდნელია, რომ 2027-2028 წლებში კიევი გერმანიაში წარმოებულ 600 ერთეულ PAC-2 რაკეტას მიიღებს. გარდა ამისა, გასული თვის ბოლოს ცნობილი გახდა პოლონეთში PAC-3 რაკეტების წარმოების ახალი შეთანხმების შესახებაც.

თუმცა, ტრამპის დაპირება იმის შესახებ, რომ რაკეტების წარმოება პირდაპირ უკრაინის ტერიტორიაზეც დაშვებული იქნებოდა, ჯერჯერობით არ შესრულებულა.

ევროპას ასევე უჭირს აშშ-თან კონკურენცია იმ სადავზვერვო მონაცემების მიწოდების კუთხით, რომლებიც რუსული ჯარების გადაადგილების თვალყურის დევნებისთვის და სამიზნეების იდენტიფიცირებისთვის არის საჭირო - განსაკუთრებით მაშინ, როდესაც საქმე ეხება რეალურ დროში მოსალოდნელი საჰაერო დარტყმების შესახებ ოპერატიული გაფრთხილების მიწოდებას.