ნინო ლაცაბიძე: მადლობა რუსთაველებს ერთიანობისთვის და საქართველოს მთავრობას, შესაძლებლობისთვის, რომელმაც ჩვენი ქალაქის ისტორიული გამოწვევის დასაძლევად გაგვაერთიანა

რუსთავში, ქალაქის მთავარი ეკოლოგიური რესურსის - ჭალის ტყეების აღდგენა-განაშენიანების პირველი ეტაპი დასრულდა. უპრეცედენტო მასშტაბის ეკოლოგიურ პროექტს რუსთავის მერია და გარემოს დაცვისა და სოფლის მეურნეობის სამინისტრო, წინასწარ შემუშავებული სტრატეგიული დოკუმენტის მიხედვით ახორციელებენ.

ჭალის ტყის აღდგენა-განაშენიანების პირველი ეტაპის დახურვის ღონისძიებაზე რუსთავის მერმა ნინო ლაცაბიძემ პირველი ეტაპი შეაჯამა და სამომავლო გეგმებზე ისაუბრა.

ღონისძიებას რუსთავის საკრებულოს თავმჯდომარე მამუკა რეხვიაშვილი, საქართველოს პარლამენტში რუსთავის დელეგატი ირაკლი შატაკიშვილი, ქვემო ქართლში სახელმწიფო რწმუნებულის პირველი მოადგილე იოსებ ალიბეგაშვილი, რუსთავის საკრებულოს დეპუტატები, ახალგაზრდები და სხვადასხვა პროფესიის ის რუსთაველები ესწრებოდნენ, რომელთაც ჭალის ტყის განაშენიანების პროცესში მიიღეს აქტიური მონაწილეობა.

„ჩვენ დღეს ისტორიული მნიშვნელობის ეკოლოგიურ პროექტში ვმონაწილეობთ, რადგან რუსთავის ჭალის ტყეები უმნიშვნელოვანესი ეკოლოგიური რესურსია არა მარტო რუსთავისთვის, არამედ თბილისის აგლომერაციის სხვა ქალაქებისთვისაც. 3500-მა რუსთაველმა უკვე მიიღო მონაწილეობა ჭალის ტყის აღდგენაში. ჩვენ ერთად ვაგრძელებთ ჭალის ტყის ისტორიას. მადლობა რუსთაველებს ერთიანობისთვის და საქართველოს მთავრობას, შესაძლებლობისთვის, რომელმაც ჩვენი ქალაქის ისტორიული გამოწვევის დასაძლევად გაგვაერთიანა“, - განაცხადა რუსთავის მერმა ნინო ლაცაბიძემ.

მასშტაბური პროექტი 320 ჰექტარ ფართობზე ბუნებრივი ტყის აღდგენას ითვალისწინებს. პირველ ეტაპზე კი ჭალის ტყის ტერიტორიაზე 10 000 ძირი ენდემური ხე-მცენარის დარგვაა განსაზღვრული. მიმდინარე წლის გაზაფხულზე 4000 ძირი ხე-მცენარე დაირგო და პროცესი შემოდგომიდან გაგრძელდება. 

ბოლო ათწლეულების ერთ-ერთ მასშტაბურ გარემოსდაცვით ინიციატივაში, რუსთავის მერიის მიერ ორგანიზებული მოხალისეობრივი კამპანიის - „გააგრძელე ჭალის ტყის ისტორია“, ფარგლებში, სხვადასხვა პროფესიის ადამიანები: მსახიობები, სპორტსმენები, სტუდენტები, ბიზნესმენები და მოსწავლეები - ჯამში 3500-მდე რუსთაველი იყო ჩართული. 

დარგვის პროცესის დაწყებამდე კი ჭალის ტყის ტერიტორიაზე მნიშვნელოვანი ინფრასტრუქტურული სამუშაოები შესრულდა. პროექტის მომდევნო ეტაპებზე ანტისეპტიკის სისტემისა და სარწყავი ქსელის მოწყობაა განსაზღვრული. დამონტაჟდება ვიდეოკამერები და სახანძრო უსაფრთხოების სისტემა. მოეწყობა დასასვენებელი და ტურისტულ-საპიკნიკე ინფრასტრუქტურა.

ჭალის ტყის აღდგენა-განაშენიანება პირველი პროექტია, რომელიც გარემოს დაცვის ფონდიდან, გარემოსთვის მიყენებული ზიანის ანაზღაურების შედეგად აკუმულირებული თანხით ფინანსდება.

რუსთავის ჭალის ტყეები მდინარე მტკვრის ორივე ნაპირზე 940 ჰექტარ ტერიტორიაზეა გაშლილი და უმნიშვნელოვანესი ეკოლოგიური რესურსია არა მარტო რუსთავისთვის, არამედ თბილისის აგლომერაციის სხვა ქალაქებისთვისაც.

ინფორმაციას რუსთავის მერია ავრცელებს.