ირაკლი ნადარეიშვილი სინგაპურის ციფრული განვითარებისა და ინფორმაციის საკითხებში სახელმწიფო მინისტრს ტან კიან ჰოუს შეხვდა

ეკონომიკისა და მდგრადი განვითარების მინისტრის მოადგილე ირაკლი ნადარეიშვილი, სინგაპურში ვიზიტის ფარგლებში, სინგაპურის ციფრული განვითარებისა და ინფორმაციის საკითხებში სახელმწიფო მინისტრს ტან კიან ჰოუს შეხვდა.

შეხვედრაზე მხარეებმა ხელოვნური ინტელექტის (AI), ტექნოლოგიების, ინოვაციური ეკოსისტემის და ციფრული ეკონომიკის განვითარების კუთხით თანამშრომლობის განვითარების შესაძლებლობები განიხილეს.

ქართულმა მხარემ ყურადღება გაამახვილა ინოვაციებზე ორიენტირებული ციფრული ეკონომიკის განვითარების პოლიტიკასა და ტექნოლოგიებზე დაფუძნებული მეწარმეობის განვითარების ხელშეწყობის სახელწიფო მექანიზმებზე. აღინიშნა, რომ საქართველოს მთავრობა აქტიურად მუშაობს ხელოვნური ინტელექტის ეროვნული სტრატეგიის შემუშავებაზე.

შეხვედრაზე ასევე იმსჯელეს სტარტაპ-ეკოსისტემის სფეროში სამომავლო თანამშრომლობის შესაძლებლობებზე. კერძოდ, საქართველოს ინოვაციებისა და ტექნოლოგიების სააგენტოს მიერ მხარდაჭერილი სტარტაპების სინგაპურის ტექნოლოგიურ ეკოსისტემასა და საერთაშორისო ბიზნესქსელებთან დაკავშირების შესაძლებლობების შესახებ.

შეხვედრას დაესწრო საქართველოს ინოვაციებისა და ტექნოლოგიების სააგენტოს თავმჯდომარე ავთანდილ კასრაძე.

საქართველოს დელეგაციის ვიზიტი სინგაპურში აზიის ტექნოლოგიური ფორუმის SWITCH - ის (სინგაპურის ინოვაციებისა და ტექნოლოგიების კვირეული) ფარგლებში იმართება. კვირეულში საქართველო ქვეყნის პავილიონით „StartUP in Georgia“ პირველად იქნება წარმოდგენილი.

ინფორმაციას ეკონომიკის სამინისტრო ავრცელებს.