სერბეთის პრეზიდენტის მოვალეობის შემსრულებელი ბრიუსელში ევროკავშირისა და დასავლეთ ბალკანეთის სამიტს არ დაესწრება

სერბეთის პრეზიდენტის მოვალეობის შემსრულებელი ბრიუსელში ევროკავშირისა და დასავლეთ ბალკანეთის სამიტს არ დაესწრება

სერბეთის პარლამენტის ახლად არჩეული თავმჯდომარე და პრეზიდენტის მოვალეობის შემსრულებელი ალექსანდარ ჩუპიჩი ევროკავშირისა და დასავლეთ ბალკანეთის სამიტს არ დაესწრება. შეხვედრა ბრიუსელში 25 ნოემბერს გაიმართება. ამის შესახებ სერბეთში ევროკავშირის დელეგაციამ განაცხადა.

ჩუპიჩმა სინანული გამოთქვა, რომ ბრიუსელში ვერ ჩავა. მან ამის შესახებ სერბეთში ევროკავშირის დელეგაციის საქმეთა დროებით რწმუნებულთან, იულიან ვასალოსთან შეხვედრისას განაცხადა.

ამასთან, მან აღნიშნა, რომ სერბეთის ახალი ხელისუფლება ევროკავშირთან თანამშრომლობას განსაკუთრებულ მნიშვნელობას ანიჭებს. მისივე თქმით, ევროკავშირთან ურთიერთობების განვითარება და ძირითადი რეფორმების განხორციელება ქვეყნის უმთავრეს პრიორიტეტებს შორის რჩება.

შეხვედრა ევროკავშირის რეზიდენციაში ჩუპიჩის თანამდებობაზე ყოფნის პირველ სამუშაო დღეს გაიმართა. მას სტუდენტური მოძრაობის წარმომადგენლებიც ესწრებოდნენ. მოლაპარაკებების მთავარი თემა სერბეთის ევროპული ინტეგრაცია და ევროკავშირში გაწევრიანებისთვის აუცილებელი რეფორმები იყო. განსაკუთრებული ყურადღება დაეთმო პარლამენტის როლს ამ პროცესში, კანონის უზენაესობასა და ევროკავშირთან მოლაპარაკებების 23-ე და 24-ე თავებს, რომლებიც სასამართლო სისტემას, ძირითად უფლებებს, მართლმსაჯულებას, თავისუფლებასა და უსაფრთხოებას ეხება. შეხვედრის მონაწილეებმა ხაზი გაუსვეს დემოკრატიული ინსტიტუტების გაძლიერების, სასამართლოს დამოუკიდებლობის დაცვის, მედიის თავისუფლების გაუმჯობესებისა და ევროპული ინტეგრაციის შესახებ მოქალაქეთა უკეთ ინფორმირების აუცილებლობას.

მხარეები შეთანხმდნენ, რომ განათლების, ენერგეტიკისა და გარემოს დაცვის საკითხებზე ტექნიკურ დონეზე დამატებითი კონსულტაციები გაიმართება. ევროკავშირმა კიდევ ერთხელ დაადასტურა გაფართოების პოლიტიკისადმი ერთგულება და სერბეთის ევროპული ინტეგრაციის მხარდაჭერა.

ამასთან, ბრიუსელში აღნიშნეს, რომ გაწევრიანების მოლაპარაკებებში პროგრესი რეფორმების გაგრძელებაზეა დამოკიდებული.

შეგახსენებთ, რომ 17 ნოემბერს სერბეთის ახლად არჩეულმა პარლამენტმა პირველი სხდომა გამართა. საპარლამენტო უმრავლესობა ოპოზიციურმა გაერთიანებამ, „სტუდენტურმა სიამ“ მოიპოვა.