საქართველოს რეგიონული განვითარების მინისტრის მოადგილემ, ზაზა კვიციანმა სენაკის, აბაშის, ხობისა და ზუგდიდის მუნიციპალიტეტებში მიმდინარე ინფრასტრუქტურული პროექტები დაათვალიერა
საქართველოს რეგიონული განვითარების მინისტრის მოადგილე ზაზა კვიციანმა, სამინისტროს მუნიციპალიტეტის ორგანოებთან ურთიერთობისა და რეგიონებში განსახორციელებელი პროექტების დეპარტამენტის ხელმძღვანელ მინდია ღლონტთან და სამეგრელო-ზემო სვანეთის სახელმწიფო რწმუნებულთან დავით ვერავასთან ერთად, სენაკის, აბაშის, ხობისა და ზუგდიდის მუნიციპალიტეტებში მიმდინარე ინფრასტრუქტურული პროექტები დაათვალიერა.
სენაკის მუნიციპალიტეტში მინისტრის მოადგილე გაეცნო სოფელ საწულეისკირიოში მინი სპორტული მოედნის მოწყობის, სოფელ საადამიოში სტიქიის შედეგად დაზიანებული ხიდის ბურჯის გამაგრებისა და რუსთაველის ქუჩაზე მრავალბინიანი საცხოვრებელი სახლების ფასადების რეაბილიტაციის სამუშაოებს.
აბაშის მუნიციპალიტეტში ზაზა კვიციანმა დაათვალიერა ილიას ქუჩასა და კვათანის უბანში სკვერების მოწყობის, ასევე წყემის ადმინისტრაციულ ერთეულში სკოლის სპორტდარბაზისა და დამხმარე სივრცეების სარემონტო სამუშაოების მიმდინარეობა.
ხობის მუნიციპალიტეტში მინისტრის მოადგილე გაეცნო ნოჯიხევის ადმინისტრაციულ ერთეულში გზის რეაბილიტაციის პროცესს, რომელიც ბეტონის საფარის მოწყობას, სანიაღვრე სისტემის, საგზაო ნიშნებისა და სხვა საგზაო ინფრასტრუქტურის განახლებას ითვალისწინებს. აღინიშნა, რომ მუნიციპალიტეტში რეგიონებში განსახორციელებელი პროექტების ფონდის დაფინანსებით საგზაო ინფრასტრუქტურის მიმართულებით 16 მილიონ ლარზე მეტი ღირებულების 8 პროექტი ხორციელდება.
ზუგდიდში მინისტრის მოადგილემ ასევე დაათვალიერა ვეკუას, ამბროსი ხელაიას, ჯიქიასა და შოთა დარასელიას ქუჩებზე მიმდინარე საგზაო ინფრასტრუქტურის სარეაბილიტაციო სამუშაოები, რომელთა ფარგლებში ქალაქში 8 კილომეტრამდე გზის მოწყობა მიმდინარეობს.
შეხვედრას ასევე ესწრებოდნენ სამეგრელო-ზემო სვანეთის სახელმწიფო რწმუნებულის მოადგილე ლუდუკ ხასია, მუნიციპალიტეტების მერები, საკრებულოს თავმჯდომარეები და ადგილობრივი თვითმმართველობის წარმომადგენლები.