ბადიაურში კვების პროდუქტების სავაჭრო სივრცის პროექტირება იწყება

ბადიაურში კვების პროდუქტების სავაჭრო სივრცის პროექტირება იწყება.

ინფრასტრუქტურის სამინისტროს მუნიციპალური განვითარების ფონდმა შესაბამისი ხელშეკრულება კონკურსში გამარჯვებულ კომპანიასთან გააფორმა. მომსახურების ვადად განსაზღვრულია 4 თვე.

პროექტის მიხედვით, საგარეჯოს მუნიციპალიტეტის სოფელ ბადიაურში, ადგილობრივი კვების პროდუქტების სარეალიზაციოდ განკუთვნილ ტერიტორიაზე უნდა მოეწყოს თანამედროვე სავაჭრო და სამეწარმეო ზონები. ტერიტორიაზე დაიგეგმება პავილიონების, სათავსოების და ჯიხურების განთავსება, ავტოსადგომის მოწყობა, ასევე საზოგადოებრივი სველი წერტილების, უსაფრთხოების, გარე განათების, ელექტრომომარაგების, წყალმომარაგებისა და კანალიზაციის სისტემების შექმნა.

ყველა საჭირო ინფრასტრუქტურით აღჭურვილი სავაჭრო სივრცე მოეწყობა საგარეჯო-ბადიაურის 17-კილომეტრიანი მაგისტრალური გზის მშენებლობის ფარგლებში, ახალი მაგისტრალის სატრანსპორტო კვანძთან, სადაც ადგილობრივი მეწარმეები შეძლებენ უსაფრთხო გარემოში პროდუქციის რეალიზაციას და სტაბილური შემოსავლის მიღებას.

ბადიაურის ახალი სავაჭრო სივრცე ხელს შეუწყობს ადგილობრივი პროდუქციის პოპულარიზაციას და შექმნის თანამედროვე სტანდარტების შესაბამის ბიზნეს გარემოს.