დღეს ბრიუსელში საქართველოს წარმომადგენლებთან ვიზალიბერალიზაციის საკითხზე ტექნიკური ხასიათის შეხვედრა გაიმართება
დღეს ბრიუსელში საქართველოს წარმომადგენლებთან, ვიზალიბერალიზაციის საკითხზე შეხვედრა გაიმართება, რომელსაც ევროკომისიის განმარტებითვე, ტექნიკური ხასიათი ექნება. ოფიციალური თბილისი კი ევროკომისიის წარმომადგენლებს კონკრეტულ ფაქტებს წარუდგენს, რომ საქართველო ვიზალიბერალიზაციით ნაკისრ ყველა ვალდებულებას ასრულებს.
„იარაღი ქართველი ხელისუფლებისა და ხალხის წინააღმდეგ“ - ასე აფასებს პარლამენტის თავმჯდომარე ევროკავშირის მხრიდან ვიზალიბერალიზაციის შესაძლო შეჩერების საფრთხეს.
„ქართულ ოცნებაში“ მიაჩნიათ, რომ აღნიშნული თემით სპეკულაცია, ოპოზიციის წისქვილზე ასხამს წყალს მაშინ, როცა რეალურად არანაირი მყარი არგუმენტი ან სამართლებრივი საფუძველი არ არსებობს საქართველოსთვის ვიზალიბერალიზაციის შესაჩერებლად.
საქართველოს ვიცე-პრემიერმა, საგარეო საქმეთა მინისტრმა მაკა ბოჭორიშვილმა განმარტა, რომ 11 ივნისს დაგეგმილი შეხვედრა ევროკავშირის რეგულაციით არის გათვალისწინებული.