სომხეთის მთავრობამ მხარი დაუჭირა კანონპროექტს, რომელიც ქვეყანაში თითქმის ყველა მობილური ტელეფონის IMEI-ის ეროვნულ მონაცემთა ბაზაში რეგისტრაციას მოითხოვს
სომხეთის მთავრობამ მხარი დაუჭირა კანონპროექტს, რომელიც ქვეყანაში თითქმის ყველა მობილური ტელეფონის ცენტრალიზებულ ეროვნულ მონაცემთა ბაზაში რეგისტრაციას მოითხოვს.
„ელექტრონული კომუნიკაციების შესახებ“ კანონში და მასთან დაკავშირებულ კანონმდებლობაში შეთავაზებული ცვლილებები მთავრობის 25 ივნისის სხდომაზე დამტკიცდა.
პარლამენტის მიერ დამტკიცების შემთხვევაში, სისტემა მოითხოვს, რომ ყველა მობილური მოწყობილობა სომხეთის მობილურ ქსელებში ლეგალურად მუშაობის დაწყებამდე ცენტრალიზებულ IMEI მონაცემთა ბაზაში დარეგისტრირდეს.
მთავრობის წარმომადგენლები ამტკიცებენ, რომ ღონისძიება მიზნად ისახავს უკანონოდ იმპორტირებული, ყალბი ან გაყალბებული მობილური ტელეფონების მიმოქცევის აღმოფხვრას, გადასახადებისგან თავის არიდების შემცირებას, ბაზრის გამჭვირვალობის გაუმჯობესებას და საზოგადოებრივი უსაფრთხოების გაძლიერებას.
სომხეთის პრემიერ-მინისტრმა ნიკოლ ფაშინიანმა ინიციატივა დიდი ხნის ნანატრ მცდელობად შეაფასა, რომელიც სომხეთის უდიდესი ჩრდილოვანი ბაზრის დემონტაჟს ისახავდა მიზნად.
„მობილური ტელეფონების ბაზარი უდიდესი ჩრდილოვანი ბაზარია და ყველაფრის მიუხედავად, რასაც ვაკეთებთ, ის კვლავაც აგრძელებს ფუნქციონირებას. სომხეთის რესპუბლიკაში არც ერთი ტელეფონი, რომლის ლეგალურად იმპორტირებაც ვერ დადასტურდება, არ იმუშავებს“, – განაცხადა ფაშინიანმა.
სომხური მედია წერს, რომ წინადადებამ შეშფოთება გამოიწვია კონფიდენციალურობის, კიბერუსაფრთხოების და ინფორმაციის სამომავლო გამოყენების შესახებ. ინიციატივის საბოლოოდ დამტკიცების შემთხვევაში, მონაცემთა ბაზა შესაძლებელს გახდის, დადგინდეს, ვინ იყენებს კონკრეტულ მობილურ ტელეფონს. გარდა ამისა, მონაცემთა ბაზის ადმინისტრატორს ექნება საშუალება, შეგროვებული ინფორმაციის საფუძველზე სახელმწიფო და ადგილობრივი ხელისუფლების ორგანოებს, ხოლო გარკვეულ შემთხვევებში, კერძო სუბიექტებსაც სხვადასხვა ციფრული მომსახურება გაუწიოს.
ცნობისთვის, IMEI არის უნიკალური 15-ნიშნა საიდენტიფიკაციო ნომერი, რომელიც ენიჭება ყველა მოწყობილობას. მას შეუძლია მობილურ ქსელთან, მათ შორის სმარტფონებთან, SIM ფუნქციონალის მქონე პლანშეტებთან, სმარტ საათებთან და მსგავს მოწყობილობებთან დაკავშირება.